Аймақтық инновациялық университеті мен Оңтүстік Кореяның Бэксок (Baekseok University) университеті арасында стратегиялық ынтымақтастық орнатылды
 
Аймақтық инновациялық университетінде Қазақстан мен Корея Республикасы арасындағы білім беру саласындағы халықаралық байланыстарды нығайтуға бағытталған маңызды іс-шара өтті. Кездесу барысында Аймақтық инновациялық университеті, Кореяның беделді Бэксок университеті (Baekseok University) және «GlobalSapa» халықаралық академиясы арасында үш жақты меморандумға қол қойылды.
 
Бұл тарихи құжатқа 2025 жылдың 17 желтоқсанында қол қойылып, тараптар бес жыл мерзімге созылатын өзара тиімді серіктестікке уағдаласты.
Делегация құрамы:
Beom Joon Kim — Бэксок университетінің вице-президенті;
Sang Gun Hwang — Baekseok University Халықаралық қатынастар бөлімінің басшысы;
Руслан Тұрсынов — «Bestgate Global Consulting» халықаралық ұйымының құрылтайшысы және директоры.
 
Ынтымақтастықтың негізгі бағыттары
Қол қойылған меморандум студенттер мен оқытушылар құрамы үшін жаңа мүмкіндіктер көзі болып табылады. Келісім аясында келесі бағыттар бойынша жұмыс жүргізіледі:
1.      Бірлескен білім беру бағдарламалары: Студенттерге арналған 1+1, 2+1, 2+2 және 3+2 форматындағы оқу бағдарламаларын әзірлеу және іске асыру.
2.      Қос диплом: Оқуды аяқтаған соң екі университеттің де дипломын алу мүмкіндігі (Double Degree).
3.      Академиялық ұтқырлық: Студенттер мен оқытушылар арасындағы өзара тәжірибе алмасу және тағылымдамалар.
4.      Стипендиялық қолдау: Студенттерге арналған арнайы стипендиялық бағдарламаларды ұсыну.
5.      Мансаптық даму: Оқуды бітірген түлектерге екі ел аумағында жұмыс іздеуге қолдау көрсету.
6.      Ғылыми серіктестік: Бірлескен зерттеулер жүргізу, ғылыми конференциялар мен семинарлар ұйымдастыру.
 
Маңыздылығы
Бұл келісім Қазақстан мен Корея арасындағы білім байланыстарын жаңа деңгейге көтеріп, халықаралық стандартқа сай, бәсекеге қабілетті кадрлар даярлауға мүмкіндік береді. Аймақтық инновациялық университеті осы меморандум арқылы өзінің халықаралық аренадағы позициясын нығайтып, студенттеріне әлемдік деңгейдегі білім алуға жағдай жасайды.