Халықаралық тәжірибе алмасу: Білім мен мәдениеттің үндесуі

Қазіргі уақытта әлемде білім алу мен ғылыми ізденістер шекаралардан тысқары шығып, университеттер арасындағы халықаралық ынтымақтастықтың маңызы артып келеді. Осы орайда, Аймақтық инновациялық университетімізге 02.12-16.12.2024 жж. аралығында Мирзо Улуғбек атындағы Самарканд мемлекеттік сәулет - құрылыс университетінің оқытушылар мен студенттер тобы келді. Олардың басты мақсаты — білім мен тәжірибе алмасу, жаңа мәдениеттермен танысу және халықаралық деңгейде білім сапасын арттыру.

«Бизнес және басқару» кафедрасына екі елдің оқу процестері мен ғылыми-зерттеу жұмыстарының инновациялық әдістемелерін тәжірибе алмасу мақсатында, Қазақстан мен Өзбекстан экономикасын нығайту үшін екі ел арасындағы сауда-экономикалық байланыстарды кеңейту және білім мен технология алмасуды дамыту арқылы тұрақты даму мен өсуге қол жеткізуге бағытталған бірлескен жобалар мен бастамалар іске асырылды.

Бұл бастама университетіміз үшін маңызды сәт болып табылады, себебі ол өзара түсіністік пен ынтымақтастықты нығайтуға, жаңа ғылыми ізденістер мен инновациялық әдістерді бірге қолдануға мүмкіндік береді. Қонақтарымыздың келген күнінен бастап, олар біздің университеттің академиялық ортасына терең бойлап, түрлі лекциялар мен семинарларға қатысып, өз елдерінде жүргізілген зерттеулер мен білім беру әдістері туралы ой бөлісуде. Сонымен қатар, студенттер мен оқытушылар арасындағы ынтымақтастық әрі қарайғы зерттеу жұмыстары мен жобалар үшін құнды негіз қалайды.

Осы халықаралық тәжірибе алмасу бағдарламасы бізге жаңа ғылыми көзқарастар мен білім беру тәсілдерін үйренуге ғана емес, сондай-ақ әлемнің әртүрлі мәдениеттерімен танысып, олардың құндылықтары мен өмір салттарын түсінуге мүмкіндік береді. Бұл тәжірибе студенттер мен оқытушылар үшін естен кетпес сәттер мен жаңа мүмкіндіктер туғызады.

Біздің университетіміздің әлемдік білім кеңістігіне қосқан үлесі мен халықаралық ынтымақтастықты дамыту жолындағы еңбегі осы сияқты жобалар арқылы ғана емес, сонымен қатар болашақтағы ғылыми жетістіктерімізбен де өркендейді. Осы халықаралық бағдарламаның жемісті әрі нәтижелі болуына сеніміміз мол!